Samsæriskenning: Sértrúarsöfnuðurinn MAD-búð

Mötuneyti okkar Verzlinga, Matbúð, virðist einungis stunda saklausa og krúttlega matargerð. En þó er ekki allt með felldu. Ritnefndinni bárust nýverið nafnlaus ábending um að matbúð gæti í raun og veru verið sértrúarsöfnuður.

Sértrúarsöfnuðurinn ber nafnið MAD-búð og er matbúð einungis dulnefni safnaðarins. M, A og D tákna þrjú grunngildi safnaðarins á latínu. Fyrsta gildið er marmore eða marmari á Íslensku, annað gildið er amore eða ást og þriðja gildið er deus eða guð. Söfnuðurinn á rætur að rekja til Flórens á 14. öld. Í Háskólanum í Flórens má finna marmaragólf rétt eins og í Verzló. Starfsfólk skólans fór að taka upp á því að tilbiðja hinn eina sanna marmaraguð Itzli. Þeir færðu honum fórnir og báðu til hans í skjóli nætur á marmarasvæði skólans. Fórnin var í formi nýnema við skólann.

 

Heimildir ritnefndarinnar herma að þetta hafi verið stundað frá því að skólinn flutti úr upphaflegu húsakynnum sínum yfir í þau nýju við Ofanleiti árið 1986. Er það engin tilviljun að Marmarinn hafi verið hluti af byggingunni en samtökin MAD höfðu þá nýverið náð fótfestu sinni á Íslandi. Starfsfólk skólans tók að færa guðinum fórnir við hvert fullt tungl. Hefur það ávalt verið venjan að fórnin sé nýnemi sem virðist stefna í að verða marmarakóngur/drottning, ásamt merkjavörum að verðmæti tvöhundruð þúsund króna. Sértrúarsöfnuðinn hefur því fórnað hátt í 416 nemendum síðan að samtökin voru stofnuð hér á landi.

 

Árið 2011 sá söfnuðurinn fram á fjárhagsvanda og tók því upp á því að opna mötuneyti við skólann, MAD-búð, undir dulnefninu Matbúð. Þó að matbúðarkonurnar virðist ljúfar sem lamb, þá er ekki allt sem sýnist. Ef þú ert busi þá skaltu líta vel í kringum þig. Taktu vel eftir því hvort einhver vinur eða vinkona „falli um áramótin“ eða „skipti um skóla“.